Sumqayıt Dövlət Universiteti (SDU) QS Dayanıqlılıq (Sustainability) 2027 Reytinqində ilk dəfə iştirak edərək dünya universitetləri arasında 1501+ reytinq intervalında yer alıb. Universitet Asiyada 584-cü, Azərbaycan üzrə reytinqdə təmsil olunan 9 ali təhsil müəssisəsi arasında 5-ci mövqedə qərarlaşıb.
Sumqayit24.az xəbər verir ki, bu barədə universitetdən məlumat verilib.
QS Dayanıqlılıq Reytinqi (QS Sustainability Rankings) ali təhsil müəssisələrinin ətraf mühitin dayanıqlılığı, sosial məsuliyyət və institusional idarəetmə sahələrində fəaliyyətini və əldə etdiyi nəticələri kompleks şəkildə qiymətləndirən beynəlxalq reytinq sistemidir. QS Dayanıqlılıq Reytinqinin 2027-ci il buraxılışında dünyanın 107 ölkəsindən 2 000-dən çox ali təhsil müəssisəsi yer alıb.
SDU-nun reytinqdə ilk iştirakında əldə etdiyi nəticələr universitetin müxtəlif istiqamətlərdə fəaliyyətini əks etdirir. Belə ki, universitet Ətraf mühitin dayanıqlılığı (Environmental Sustainability) göstəricisi üzrə dünya universitetləri arasında 428-ci, Yaxşı idarəetmə (Good Governance) göstəricisi üzrə 767-ci yerdə qərarlaşıb. Ətraf mühitə təsir (Environmental Impact) və Sosial təsir (Social Impact) istiqamətlərində isə universitet 1251+ reytinq intervalında yer alıb.
Azərbaycan üzrə nəticələr də universitetin ayrı-ayrı istiqamətlərdə mövqeyini ortaya qoyur. SDU Təhsilin təsiri (Impact of Education) göstəricisi üzrə ölkədə 1-ci, Ətraf mühitin dayanıqlılığı (Environmental Sustainability), Məşğulluq və imkanlar (Employability and Opportunities), eləcə də Sağlamlıq və rifah (Health & Wellbeing) göstəriciləri üzrə 2-ci mövqedə qərarlaşıb.