Saray qəsəbəsində küçə işıqlandırmasının təmin edilməməsi narazılığa səbəb olub.
Bu barədə Sumqayit24.az-a qəsəbə sakinləri məlumat veriblər.
Vətəndaşların sözlərinə görə, Sülh küçəsində, 522 nömrəli avtobusun hərəkət etdiyi əsas yolda işıq dirəkləri olsa da, axşam saatlarında işıqlandırma təmin edilmir.
Bildirilib ki, qaranlıq küçə həm sürücülərin, həm də piyadaların hərəkətini çətinləşdirir.
"Qızım tələbədir, axşam saat 9-da evə çatır. Mən də Sumqayıtda işləyirəm. Saat 9-da növbədən çıxıram, bura çatana kimi saat 10-un yarısı olur. Mənim kimi başqaları da var. Bir sözlə, qaranlıq yolda hərəkət etmək bizim üçün çətin olur. Burda yaşayanların niyə təhlükəsizliyi nəzərə alınmır", - deyə sakinlərdən biri narahatlığını ifadə edib.
Vətəndaşlar aidiyyəti qurumlardan problemin araşdırılmasını və küçə işıqlandırmasının təmin edilməsini xahiş edirlər.