Sumqayıt Dövlət Universitetində rektor, professor Nurəli Yusifbəyli ilə SOCAR Polymer MMC-nin baş direktoru Fuad Əhmədov arasında görüş keçirilib.
Sumqayit24.az xəbər verir ki, görüşdə ali təhsil ilə sənaye arasında əməkdaşlığın genişləndirilməsi, innovasiya yönümlü tərəfdaşlıq, tələbələrin istehsalat təcrübəsinin artırılması, birgə elmi-tədqiqat layihələri, sənaye mütəxəssislərinin tədris prosesinə cəlb olunması, seminar və təlimlərin təşkili müzakirə edilib.
Rektor Nurəli Yusifbəyli bildirib ki, SDU-nun sənaye mərkəzində yerləşməsi təhsil, elm və istehsalatın inteqrasiyası üçün geniş imkanlar yaradır. Onun sözlərinə görə, nəzəri biliklərin praktiki bacarıqlarla tamamlanması əmək bazarının tələblərinə cavab verən mütəxəssislərin hazırlanmasında əsas amildir.
Qeyd olunub ki, yeni tədris ilindən SDU ilə SOCAR Polymer arasında əməkdaşlığın yeni mərhələyə keçməsi planlaşdırılır. Prioritet istiqamətlər sırasında tədris proqramlarının əmək bazarına uyğunlaşdırılması, birgə innovasiya layihələri, istehsalat təcrübəsinin genişləndirilməsi, daha çox tələbənin müəssisədə təcrübə keçməsi və yuxarı kurs tələbələrinin tədrisinin bir hissəsinin istehsalat sahələrində təşkili yer alır.
Görüşdə Polimer Materialları İnstitutunun elmi-tədqiqat fəaliyyətinin sənaye ilə inteqrasiyası da müzakirə olunub. Bildirilib ki, yüksək möhkəmliyə, aşağı yanma sürətinə və ekoloji təhlükəsizlik göstəricilərinə malik nanokompozit materialların hazırlanmasına dair layihələrin SOCAR Polymer-ə təqdim edilməsi nəzərdə tutulur. Bu layihələrin innovativ məhsulların istehsalına və tətbiqi tədqiqatların kommersiyalaşdırılmasına töhfə verəcəyi vurğulanıb.
SOCAR Polymer-in baş direktoru Fuad Əhmədov ali təhsil müəssisələri ilə əməkdaşlığın strateji əhəmiyyət daşıdığını bildirərək, tədris, istehsalat təcrübəsi və tətbiqi elmi-tədqiqat sahələrində əməkdaşlığın genişləndirilməsinə dəstək verməyə hazır olduqlarını qeyd edib.
