SDU-nun Fizika və elektroenergetika fakültəsinin bir qrup professor-müəllim və tələbə heyəti N. Tusi adına Şamaxı Astrofizika Rəsədxanasında olub. Bu haqda 15 may tarixində Sumqayıt24 Sumqayıt Dövlət Universitetinə (SDU) istinadən xəbər verir.
Ziyarət zamanı rəsədxananın elmi katibi, astronomiya üzrə fəlsəfə doktoru, dosent Orxan Xəlilov və Astrofizika və ulduz astronomiyası ixtisası üzrə dissertant, elmi işçi Səbahəddin Alışov qonaqlara rəsədxananın tarixi və görülən işlər barədə geniş məlumat verib. Bildirilib ki, rəsədxanada 100-ə yaxın elmi işçi elmi-tədqiqat işi aparır.
Rəsədxananın muzeyində Azərbaycan ərazisinə düşən 2 meteorit eksponat kimi saxlanılır, əvvəlki teleskopun idarəetmə pultu, eləcə də 2-si günəş, 4-ü ulduz teleskopu olmaqla 6 teleskop haqqında geniş məlumat verilərək müəllim və tələbələrin sualları cavablandırılıb. Nobel mükafatına layiq görülən astrofiziklərin şəkillərindən ibarət olan stendlər tələbələr tərəfindən maraqla qarşılanıb.
