Sumqayıt Dövlət Universitetinin nümayəndələri Almaniyaya səfər ediblər. Bu barədə Sumqayıt24 xəbər verir.
Rektor müşaviri, dosent Zəfər Hüseynov və Təhsildə keyfiyyət təminatı şöbəsinin müdiri, baş müəllim Nərmin Həsənova nüfuzlu akkreditasiya qurumu ASİİN-də (Düsseldorf şəhəri) olublar. Ezamiyyətin məqsədi Mühəndislik fakültəsi üzrə 3 təhsil proqramının beynəlxalq akkreditasiyadan keçirilməsini müzakirə etmək, akkreditasiyadan öncəki prosedurla tanışlıq, özünüqiymətləndirmə hesabatlarının ASİİN qayda və təlimatlarına uyğun hazırlanması olub.
ASİİN-in icraçı direktoru Dr. İrinq Vasser və layihə meneceri Paulina Petraçenko ilə proqramların akkreditasiyasına aid müqavilə hazırlanıb. Həmçinin özünütəhlil hesabatlarının hazırlanması, agentliyə təqdim edilməsi və beynəlxalq ekspertlərin SDU-ya səfərinin tarixləri dəqiqləşdirilib.
Daha sonra nümayəndə heyətimiz Brandenburq Texniki Universitetinə (BTU) səfər edib. Görüşdə Metalkəsən dəzgahlar kafedrasının müdiri və Maşınqayırma, elektronika və elektrik sistemləri fakültəsinin dekan müavini prof. Dr. Silvia Simon, təhsil müəssisəsinin digər akademikləri, həmyerlilərimiz: BTU-nun doktorantı İlqar Abbasov və elmi işçisi Daşqın Turabov iştirak ediblər.
Səfər çərçivəsində BTU-nun ən son müasir avadanlıqlarla təchiz olunmuş laboratoriya və auditoriyaları ilə tanışlıq olub. Universitetlər arasında əməkdaşlıq barədə müzakirələr aparılıb. Təhsildə keyfiyyət təminatı şöbəsinin müdiri Nərmin Həsənova SDU haqqında geniş videotəqdimatla çıxış edib.
Prof. Dr. Silvia Simon SDU-nun tələbələrini yayda Almaniyaya BTU-da təcrübə proqramlarında iştirak etməyə dəvət edib. SDU-nun nümayəndə heyəti də professoru Sumqayıtda mühazirələr aparmağa dəvət edib.
