Sumqayıtda sakinlərin narazılığına səbəb olan tikinti işləri dayandırılıb.
Bu barədə Sumqayit24.az-a Fövqəladə Hallar Nazirliyindən (FHN) məlumat verilib.
Bildirilib ki, Qeyd olunub ki, nazirliyin Tikintidə Təhlükəsizliyə Nəzarət Dövlət Agentliyinin mütəxəssisləri 16-cı mikrorayonda, 7 nömrəli binanın yaxınlığına baxış keçiriblər. Baxış zamanı tikinti məqsədilə metal dirəklərin quraşdırıldığı müəyyən edilib.
Tikintiyə dair icazə sənədləri tələb olunsa da, həmin sənədlər təqdim edilməyib. Bununla əlaqədar, FHN mütəxəssislərinin və Sumqayıt Şəhər İcra Hakimiyyəti nümayəndələrinin iştirakı ilə metal dirəklər sökülərək ərazi əvvəlki vəziyyətinə qaytarılıb.
Xatırladaq ki, binanın yaxınlığında yerləşən aptekin yanında əlavə tikilinin inşasına başlanılmasının sakinlərin narazılığına səbəb olması ilə bağlı xəbər yayımlamışdıq. Sakinlər tikintinin qanuniliyinə şübhə ilə yanaşır, işlərin davam edəcəyi təqdirdə piyadaların hərəkət etdiyi yolun daralacağından narahat olduqlarını bildirirdilər.
