Sumqayıtın Hacı Zeynalabdin qəsəbəsində kanalizasiya problemi sakinlərin narazılığına səbəb olub.
Bu barədə Sumqayit24.az-a Səməd Vurğun küçəsinin sakinləri məlumat veriblər.
Vətəndaşların sözlərinə görə, ərazidə kanalizasiya sistemi tez-tez sıradan çıxır və çirkab sular ətrafa yayılır.
Sakinlər iddia ediblər ki, məsələ ilə bağlı aidiyyəti quruma məlumat versələr də, problem həllini tapmayıb.
"Kanalizasiyanın tez-tez daşması nəticəsində ərazidə pis qoxu yaranır və hərəkət etmək çətinləşir. Məsələ ilə bağlı aidiyyəti quruma məlumat versək də, cavab olaraq "cavan adamsınız, tullanıb keçin üstündən" deyiblər. Bəs uşaqlar və yaşlılar neyləsinlər? Yayda ərazidəki vəziyyətə görə uşaqlardan birinin bədənində səpkilər də yaranmışdı",- deyə sakinlər idda ediblər.
Sumqayit24.az-a İri Şəhərlərin Su Təchizatı Xidmətindən bildirilib ki, bir müddət öncə sözügedən ünvanın tullantı su xəttindəki qəza Sumqayıt Sukanal İdarəsinin briqadası tərəfindən aradan qaldırılıb. Xəttin fəaliyyəti bərpa edilib. Hazırda ərazidə tutulma müşahidə edilmir.
"Bir daha qeyd edirik ki, tullantı su xətlərində tutulmalara səbəb vətəndaşların şəbəkəyə müxtəlif məişət tullantıları atmalı olur. Tullantı su xətti yalnız tullantı suyu axıtmaq üçündür. Sakinlərdən xahiş olunur ki, kanalizasiya xətlərinə tullantı suyundan kənar əşyalar məişət tullantıları (salfet, qida qalıqları, sellofan və s.) atmasınlar. Nəticədə bu qalıqlar yığılaraq xətdə tutulma yaradır və ərazidə antisanitar və xoşagəlməz mənzərə yaranır. Bu halın təkrarlanması vətəndaşlardan tullantıların təyinatı üzrə atılmasına və kanalizasiya xətlərindən düzgün istifadə qaydalarına riayət etmələri xahiş olunur", - deyə açıqlamada qeyd olunub.
