Sumqayıtda "Regionlarda ictimai iştirakçılığın təmin olunması və ictimai nəzarətin gücləndirilməsi" layihəsi üzrə ictimai müzakirə keçirilib. Sumqayıt24 bu haqda 13 sentyabr tarixində xəbər verir.
Tədbir "Bakı Qeyri-Hökumət Təşkilatlarının Resurs və Təlim Mərkəzi" İB tərəfindən, Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə Heydər Əliyev Mərkəzində təşkil olunub.
Burada Abşeron, Xızı, Sumqayıt bölgələri üzrə axund Hacı Rauf Sərdarov, deputat Müşfiq Məmmədli, Sumqayıt Ağsaqqallar Şurasının sədri Təbrik Quliyev, Sumqayıt şəhər icra hakimiyyətinin nümayəndəsi Mehriban Nəcəfova, Sumqayıt şəhər İcra Hakimiyyəti yanında İctimai Şuranın sədri Hümbət Quliyev, "Şöhrət” ordenli şair-pedaqoq Ofelya Babayeva, dövlət qurumlarının, mərkəzi və yerli icra hakimiyyəti, yerli özünüidarəetmə orqanlarının nümayəndələri, həmçinin KİV və mətbuat nümayəndələri iştirak ediblər.
Layihənin rəhbəri, Birliyin sədri Rauf Zeyni proqramın əsas məqsəd və vəzifələrindən danışıb. Digər çıxışçılar, həmçinin vətəndaşların dövlətin idarə olunmasında iştiraka cəlb edilməsi, mərkəzi və yerli icra hakimiyyəti, yerli özünüidarəetmə orqanlarının fəaliyyətinə ictimai nəzarətin həyata keçirilməsi, qurumlarla ictimaiyyət arasında qarşılıqlı fəaliyyətin təşkili, mərkəzi və yerli icra hakimiyyəti və yerli özünüidarəetmə orqanlarının fəaliyyətində aşkarlığın və şəffaflığın təmini, dövlət siyasətinin formalaşması, həyata keçirilməsi və qərarların qəbulu zamanı ictimai rəyin və vətəndaşların qanuni maraqlarının nəzərə alınması, əsas insan və vətəndaş hüquqlarının müdafiəsindən ibarət olmasını vurğulayıblar.
Sonda iştirakçıların sualları cavablandırılıb.
