Sumqayıt şəhər məhkəməsinin sabiq hakimi həbs edilib. Sumqayıt24 bu haqda 26 iyul tarixində Report.az-a istinadən xəbər verir.
Bəhs etdiyimiz şəxs 2008-2019-cu illərdə adıçəkilən məhkəmədə hakim vəzifəsində işləmiş İlyas Mahmudovdur. Onun icraatında olan müxtəlif mülki işlər üzrə iddiaçıların tələblərinin təmin edilməsi barədə bilə-bilə ədalətsiz qətnamə qəbul etməsi müqabilində ayrı-ayrı şəxslərdən pul almasına, bununla əlaqədar 2 halda ədalətsiz qətnamə çıxarmasına əsaslı şübhələr var.
Bundan əlavə, işlədiyi dövrdə icraatında olan digər işlər üzrə qəbul etdiyi 25 qətnaməyə əvvəlcədən bilə-bilə yalan məlumatlar daxil etməsinə, əmək stajı və əlilliyin müəyyən edilməsinə dair maxinasiyalara əl atmasına, bununla da qanunazid əsaslarla təyin olunmuş pensiyalar üzrə cəmi 243.441 manat məbləğində ödənişin verilməsinə dair əsaslı şübhələr müəyyən edilib.
Toplanan kifayət qədər sübutlar əsasında İlyas Mahmudova Cinayət Məcəlləsinin dörd maddəsi ilə ittiham elan edilməklə məhkəmənin qərarı ilə barəsində həbs qətimkan tədbiri seçilib.
Əməliyyat-istintaq tədbirləri davam etdirilir.
