Sumqayıtda yaşıllıq ərazi məhv edilir.
Sumqayit24.az-a müraciət edən sakinlər bildiriblər ki, Nəsimi adına Mədəniyyət və İstirahət parkında bir qrup şəxs tərəfindən sağlam ağaclar kəsilir. Vətəndaşların iddiasına görə, kəsilən ağacların yerinə yaxın gələcəkdə yeni attraksionlar və karusellər quraşdırılacaq.
Sakinlər məsələnin diqqətə alınmasını və yaşıllıqların qorunmasını tələb edirlər. Onlar qeyd edirlər ki, park şəhər sakinlərinin istirahət etdiyi, təmiz hava aldığı və uşaqların vaxt keçirdiyi vacib ərazidir və bu cür kəsimlərin davam etməsi narahatlıq yaradır.
Sumqayıt Şəhər İcra Hakimiyyətinin mətbuat katibi Eyvaz Qocayev Sumqayit24.az-a açıqlamasında məlumatı təkzib edib. O bildirib ki, park ərazisində yalnız qurumuş ağacların və təhlükə yaradan budaqların kəsilməsi həyata keçirilib:
“Bununla yanaşı, ərazidə abadlıq və təmizlik işləri aparılıb, sakinlərin istirahəti üçün daha rahat şərait yaradılıb”.
