Sumqayıt şəhərində yağıntılı hava başlayan kimi yol problemləri də yenidən gündəmə gəlib.
Sumqayit24.az-a bu barədə şəhərin müxtəlif ərazilərində yaşayan sakinlər məlumat veriblər.
Qeyd olunub ki, Corat qəsəbəsində, Yaşıl Dərə və Qurd dərəsi yaşayış massivlərində yağış yağdıqdan sonra yollar keçilməz vəziyyətə düşür.
Bildirilib ki, yollardakı irili-xırdalı çuxurlar su ilə dolur. Nəticədə nəqliyyat vasitələrinin, piyadaların hərəkəti çətinləşir və ərazi keçilməz vəziyyətə düşür.
"Yollar artıq çox pis gündədir. Maşınların təmirinə pul çatdırmaq olmur. Hələ yağış çox yağmayıb, vəziyyət belədir. Qışda necə olacaq?", - deyə sakinlər narahatlıqlarını qeyd ediblər.
Sakinlər aidiyyəti qurumlardan sadalanan ərazilərə baxış keçirilməsini və mövcud problemin aradan qaldırılması üçün tədbirlər görülməsini tələb edirlər.
