Sumqayıtın ictimai nəqliyyat sistemində ciddi nizamsızlıq müşahidə olunur.
Sumqayit24.az-a daxil olan şikayətdə bildirilir ki, xüsusilə Babək prospektində marşrut avtobuslarının sürücülərinin məsuliyyətsiz davranışı onsuz da tıxaclı olan yolu daha da pis vəziyyətə salır.
Redaksiyamıza göndərilən videodan aydın görünür ki, 33 nömrəli marşrut avtobusunun sürücüsü dayanacaqda dayanan 7 nömrəli avtobusun hərəkətini gözləmək əvəzinə sərnişinləri birbaşa avtomobil yolunun üzərində düşürür. Bu isə insanları real təhlükə ilə üz-üzə qoyur və qəza riski yaradır.
Hadisə bununla da bitmir. 7 nömrəli avtobusun sürücüsü də önündən keçməyə çalışan piyadalara məhəl qoymadan hərəkətə başlayır. Nəticədə sərnişinlər iki avtobusun arasında qalaraq həyatlarını riskə atmalı olurlar.
Sakinlər bildirirlər ki, bu cür hallar artıq adi hal alıb və nəzarətin zəifliyi səbəbindən sürücülər qaydalara əməl etmirlər.
