Sumqayıtın ərazisinin genişləndirilməsinin səbəbləri açıqlanıb. Sumqayıt24 bu haqda 9 oktyabr tarixində Trend.az-a istinadən xəbər verir.
Milli Məclisin Aqrar siyasət komitəsinin sədri Tahir Rzayev bildirib ki, Abşeron və Binəqədi rayonlarının bir hissəsinin Sumqayıta verilməsi reallıqdan irəli gəlir:
“Sumqayıtın daha da genişlənməsi, əhali sayının artması, burada bir sıra dövlət proqramlarının, layihələrinin həyata keçirilməsi bunu zərurətə çevirirdi. Bu gün Sumqayıt Azərbaycanın ən inkişaf edən şəhərlərindən biridir, burada bir çox beynəlxalq əhəmiyyətli tədbirlər həyata keçirilir, layihələr icra olunur, müəyyən iri müəssisələr, şirkətlər fəaliyyətə başlayıb.
Belə olan halda Sumqayıtın ərazisinin genişlənməsinə, əlavə torpaqların verilməsinə ehtiyac var idi.
Həmin ərazilərdə yaşayan sakinlər yenidən qeydiyyata alınmalıdırlar və onların sənədlərində düzəliş edilməlidir. Sözsüz ki, bunun üçün əvvəldən tədbirlər planlaşdırılıb və müvafiq orqanlara tapşırıqlar verilib”.
Xatırladaq ki, Binəqədi qəsəbəsi ərazisindən 1213 hektar, Abşeron rayonunun inzibati ərazisindən isə 375 hektar və 2223,67 hektar torpaq sahələri Sumqayıt şəhərinin inzibati ərazisinə birləşib.
