Sumqayıt şəhərinin H.Z.Tağıyev qəsəbəsini Bakı Avtovağzalı ilə əlaqələndirən avtobuslardan şikayət var.
Sumqayit24.az-a daxil olan məlumata görə, 502 nömrəli marşrut xəttinin sürücüləri avtobusların tamamilə dolmasına baxmayaraq hərəkətə başlamırlar..
"Saat 18:50-də avtobus gəlib, saat 19:35-də isə tam dolmuşdu. Sürücü yola düşmək üçün dispetçerin göstərişini gözləyirdi. Dispetçerə yaxınlaşdıq, soruşduq, iradımızı bildirdik, o isə cavabında "1 saat keçməlidir" dedi", - deyə sərnişin bildirib.
Məsələ ilə bağlı redaksiyamız tərəfindən Azərbaycan Yerüstü Nəqliyyat Agentliyinə (AYNA) sorğu ünvanlanıb. Qurumdan sorğuya cavab olaraq bildirilib ki, 502 nömrəli marşrutda 7 avtobus 15 dəqiqə intervalla fəaliyyət göstərir:
"Günün pik saatlarında marşrutun hərəkət sxemi üzrə yaranan nəqliyyat sıxlığı intervalın artmasına səbəb ola bilir. Daşıyıcılara xəttin nizamlı fəaliyyətinin təmin edilməsi və hərəkət cədvəlinə riayət olunması ilə bağlı müvafiq tapşırıqlar verilib".
