Sumqayıtın bütün ümumi təhsil müəssisələrini əhatə edən “Təhlükəsiz məktəb” sosial layihəsi yekunlaşıb.
Sumqayit24.az xəbər verir ki, 11 nömrəli məktəbdə bağlanış mərasimi keçirilib. Layihə məktəblərdə səmərəli mühitin formalaşması işinə töhfə vermək, müəllim və şagirdlər üçün təhlükəsiz mühit yaratmaq, fövqəladə hal baş verdikdə ilk tibbi və psixoloji yardım göstərmək, mütəmadi olaraq şagird, valideyn, təlim-tərbiyə müəssisələrinin kollektivləri ilə maarifləndirmə, diaqnostik işlər aparmaq məqsədilə təşkil olunub.
Abşeron-Xızı Regional Təhsil İdarəsinin rəsmiləri və şəhərin ictimaiyyət nümayəndələri əvvəlcə yaradıcı şagirdlərin əl işləri, rəsmləri, gənc idmançıların nailiyyətləri ilə tanış olublar.
Məktəbin direktoru Şəhla Bağırova proqramın əhəmiyyətindən, təhsil müəssisələrində təhlükəsiz mühitin təşkilinin vacibliyindən danışıb. Müəllim Elnarə Qurbanzadə isə internet təhlükəsizliyi mövzusunda çıxış edib.
Tədbir bədii kompozisiyalarla davam edib. Mövzu ətrafında viktorinalar, dialoqlar, müzakirələr, səhnəciklər böyük marağa səbəb olub.
