Sumqayıtda ötən gün axşam saatlarından başlayan qarlı hava şəraiti davam edir.
Apa.az-ın məlumatına görə, mövcud hava şəraitinin şəhər təsərrüfatına və nəqliyyat infrastrukturuna mənfi təsirinin qarşısını almaq məqsədilə Sumqayıt Şəhər İcra Hakimiyyətinin (ŞİH) müvafiq qurumları gücləndirilmiş iş rejiminə keçib.
Gecə saatlarından etibarən yolların buz bağlamasının qarşısını almaq üçün qum-duz qarışığı səpilib. Hazırda da bu istiqamətdə işlər davam etdirilir və nəqliyyatın hərəkətində ciddi maneələr müşahidə olunmur.
Havanın daha da kəskinləşəcəyi halda isə qarla mübarizə tədbirləri daha da gücləndiriləcək. Bununla yanaşı, Sumqayıt Şəhər İcra Hakimiyyəti şəhər ərazisində qaz, su və elektrik enerjisi təchizatında fasilələrin yaranmaması üçün aidiyyəti qurumlarla birgə mütəmadi monitorinq aparır.
Sumqayıt şəhər İcra Hakimiyyəti vətəndaşlara diqqətli olmağı, yol-nəqliyyat qaydalarına riayət etməyi və sürücülərin hava şəraitini nəzərə alaraq ehtiyatlı hərəkət etməsini tövsiyə edir.
