Notariat fəaliyyəti ilə məşğul olmaq istəyənlər üçün müsabiqə keçiriləcək. Sumqayıt24 bu haqda 11 may tarixində Ədliyyə Nazirliyinə istinadən xəbər verir.
Sumqayıt şəhərində yerləşən “ASAN xidmət” mərkəzlərində, habelə inzibati ərazi vahidində vakant notarius vəzifələrində fəaliyyət göstərmək üçün şəhadətnamə almaq istəyən, “Notariat haqqında” Qanunun tələblərinə cavab verən ali hüquq təhsilli Azərbaycan Respublikası vətəndaşları növbəti açıq müsabiqəyə dəvət edilirlər.
Xatırladaq ki, birinci mərhələ - test imtahanı Dövlət İmtahan Mərkəzi ilə birlikdə fərdi qaydada, kompüter vasitəsilə keçiriləcək. Nəticələr isə yerindəcə açıqlanacaq.
İmtahanda keçid balını toplayan namizədlər müsahibəyə buraxılırlar. Burada da uğur qazanan hüquqşünaslar Ədliyyə Akademiyasında icbari təlimə cəlb olunurlar. Sonda aparılan qiymətləndirmənin nəticəsi üzrə şəhadətnamə verilir.
Bildirilir ki, hüquqşünaslara müsabiqəyə hazırlaşmalarına köməklik məqsədilə Ədliyyə Akademiyasında xüsusi hazırlıq kursları təşkil olunacaq.
İmtahanda iştirak etmək istəyən şəxslər sənədlərini mayın 15-dən etibarən Ədliyyə Nazirliyinin Ədliyyə sahəsində xidmətlər baş idarəsinə (Bakı şəhəri, Azadlıq prospekti, 72) bütün iş günləri təqdim edə bilərlər.
Tələb olunan sənədlərin siyahısı, imtahan, müsahibə və icbari təlimin keçirilməsi qaydaları ilə nazirliyin internet saytında (www.justice.gov.az) tanış olmaq, habelə 404-42-28, 404-42-29 nömrələri vasitəsilə məlumat almaq mümkündür.
