Sumqayıtda qızıl alveri ilə məşğul olduğu bildirilən Balaxanım Atakişiyevanın barəsində çıxarılan bəraət hökmündən kassasiya şikayəti verilib.
Şikayətə iyulun 24-də Ali Məhkəmədə hakim Ələsgər Novruzovun sədrliyi ilə baxılacaq.
İttihama əsasən, Balaxanım Atakişiyeva Bakı və Sumqayıt şəhərlərində qızıl alveri ilə məşğul olub. O, "Moskva" univermağında çalışan Minarə İbayeva ilə alver əlaqələri quraraq əvvəlcə topdansatış qiymətinə aldığı qızıl-zinət əşyalarının pulunu vaxtında ödəyib və onun etibarını qazanıb.
Daha sonra isə Minarə İbayeva, onun oğlu və kürəkənindən ümumilikdə 62 min manat dəyərində qızıl-zinət əşyaları götürdüyünu, lakin pulunu qaytarmadığını iddia edib. Bildirilir ki, B.Atakişiyeva zərərçəkmişi bir müddət pul əvəzinə ona "Toyota Prado" markalı avtomobil verəcəyinə inandırsa da, bu vədini yerinə yetirməyib.
Balaxanım Atakişiyeva polis əməkdaşlarının keçirdiyi əməliyyat nəticəsində saxlanılıb. Lakin Sumqayıt Ağır Cinayətlər Məhkəməsi onun təqsirinin sübuta yetirilmədiyi qənaətinə gələrək bəraət hökmü çıxarıb.
Bu qərarla razılaşmayan zərərçəkmiş tərəf kassasiya şikayəti verib və işə yenidən Ali Məhkəmədə baxılacaq.
Mənbə: Pravda.аz
