Sumqayıt məktəblərində özbaşınalıq hallarının artması ilə bağlı iddialar səsləndirilib.
Sumqayit24.az-a müraciət edən valideynlər iddia ediblər ki, şəhərin bir neçə təhsil ocağında sinif rəhbərləri və məktəb administrasiyası şagirdlərə məcbur sirk bileti və sınaq imtahanına bilet aldırırlar.
"Bəlkə kiminsə pulu yoxdur? Bəlkə kiminsə ümumiyyətlə nə sirkə, nə də sınaq imtahanına getmək istəyi yoxdur?! Onların bizim yerimizə qərar vermək hüququ yoxdur. Amma almasaq, uşaqlarımıza pis münasibət göstəriləcəyindən qorxuruq", – deyə şikayətçilər bildiriblər.
Valideynlər məsul qurumlardan bunu araşdırıb həll etmələrini tələb edirlər.
Redaksiyamız tərəfindən məsələ ilə bağlı Abşeron-Xızı Regional Təhsil İdarəsinə sorğu ünvanlanıb.
