Sumqayıt Dövlət Universitetində “Vətən yolunda addımlayanlar” filminin təqdimatı keçirilib. Sumqayıt24 bu haqda 21 oktyabr tarixində xəbər verir.
Vətən müharibəsi şəhidləri Vüsal Muradov və Azad Hümbətova həsr olunmuş film Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi və “Şəhid Ailələrinə Qayğı Cəmiyyəti”nin təşkilatçılığı ilə çəkilib.
Cəmiyyətin sədri Müşfiq Əliyev filmin Bakı şəhərində və respublikamızın digər bölgələrində də nümayiş olunacağını bildirib.
Vətən müharibəsi qəhrəmanının atası Arif Hümbətov çıxışında oğlu Azad Hümbətova göstərilən yüksək ehtirama görə Prezident İlham Əliyevə, tədbirin təşkil olunmasında zəhməti olan hər kəsə təşəkkür edib.
Şəhid leytenant Vüsal Muradovun atası Cəsarət Muradov isə övladının şəhadətindən sonra ailəsinin yanında olan hər kəsə minnətdarlığını çatdırıb.
Tədbirin sonunda sədr Müşfiq Əliyev bir sıra tədbir iştirakçılarına, o cümlədən prorektor Elmar Xəlilova birliyin döş nişanlarını təqdim edib.
