Sumqayıtın Bulvar küçəsində zibil konteynerləri üçün ayrılmış ərazidə təmizlənmə işləri aparılıb.
Sumqayit24.az-a bu barədə Sumqayıt Təmizlik Departamentindən məlumat verilib.
Qeyd olunub ki, tullantıların gündəlik olaraq ərazidən təmizlənməsi təmin olunur.
Xatırladaq ki, bu gün - avqustun 10-da Sumqayıt Yaşayış Kompleksində, 11-ci binanın yaxınlığında zibil konteynerləri üçün ayrılmış ərazinin məişət və digər tullantılarla çirkləndirilməsi ilə bağlı xəbər yayımlanıb.
***
Sumqayıtda küçələrin birində tez-tez antisanitar vəziyyət hökm sürür.
Bu barədə Sumqayit24.az-a şəhər sakinləri məlumat veriblər.
Şikayətçilərin sözlərinə görə, Bulvar küçəsi, Sumqayıt Yaşayış Kompleksində, 11-ci binanın yaxınlığında zibil konteynerləri üçün ayrılmış ərazi məişət və digər tullantılarla çirkləndirilib.
Sakinlər qeyd edirlər ki, bir neçə gündür tullantıların ərazidən vaxtında daşınması təmin olunmur. Görüntülərdən də aydındır ki, ərazidəki konteynerlər dolub və hətta ətrafına müxtəlif ölçülü tullantılar yığılıb.
Bundan əlavə, sakinlər iddia edirlər ki, konteynerlərin yaxınlığındakı yaşıllıq sahə bir ildən çoxdur zibillənib və hələ də təmizlənməyib.
"Alaq otları həmin yeri zəbt edib və kiçik meydançanın yaxınlığı zibillənib. Bir sözlə, vətəndaşların pəncərələri xoşagəlməz mənzərəyə açılır", - deyə sakin bildirib.
Onlar aidiyyəti qurumlardan əraziyə baxış keçirilməsini və mövcud problemlərin aradan qaldırılmasını xahiş edirlər.
