Sumqayıt şəhərində kommunal problemlərlə bağlı şikayət var.
Bu barədə Sumqayit24.az-a şəhər sakinləri məlumat veriblər.
Vətəndaşların sözlərinə görə, Xəzər bağları yaşayış massivində, xüsusilə Karvan və Xətai kimi tanınan küçələrdə suyun verilişində tez-tez məhdudiyyət yaranır.
Sakinlər qeyd ediblər ki, su verildiyi zaman isə təzyiq aşağı olur. Onların sözlərinə görə, bu vəziyyət vətəndaşların gündəlik həyatlarına ciddi təsir edir. Xüsusilə isti yay günlərində su probleminin yaşanması sakinlər üçün əlavə çətinlik yaradır.
Məsələ ilə bağlı Sumqayit24.az-a İri Şəhərlərin Birləşmiş Su Təchizatı Xidmətindən bildirilib ki, qeyd olunan yaşayış massivində çoxsaylı gecəqondu evlər mövcuddur və onların suya olan tələbatı əhali tərəfindən primitiv üsulla çəkilmiş xətlər vasitəsilə təmin olunur:
"Normativ qaydalara əməl olunmayaraq kiçik diametrli borulara 1 yox bir neçə sakinin qoşulması halı mövcuddur. Bu baxımdan hazırda su təminatında çətinliklər yaşanmaqdadır. Suya tələbatın çox olduğu yay vaxtlarında bu kimi primitiv xətlərdə su təchizatı tam normalara uyğun həyata keçirilə bilmir".
Bundan əlavə, Karvan küçəsinin sakinləri elektrik enerjisinin də sabit olmadığını və tez-tez problemlər yaşandığını bildiriblər.
Qeyd olunur ki, elektrik enerjisinin qeyri-sabit olması məişət avadanlıqlarının istifadəsinə də mənfi təsir göstərir.
Məsələ ilə bağlı aidiyyəti quruma sorğu ünvanlanıb.
