Sumqayıtda bəzi restoranlar axşam saatlarında havanı çirkləndirirlər. Obyektlərdən yayılan kabab iyi və tüstüsü vətəndaşların istirahətinə mane olur.
Belə ki, restorandan havaya buraxılan tüstü ətrafda yaşayan insanların az qala evinə kimi dolur… Dəfələrlə edilən müraciətlərə baxmayaraq, hər hansı tədbir görülmür. Şəhərin bəzi ərazilərində şadlıq saraylarının yanaşı tikilməsi vəziyyəti daha da qəlizləşdirir.
Xeberle.com məsələ ilə bağlı Ekologiya və Təbii Sərvət Nazirliyi (ETSN) ilə əlaqə saxlayıb. Qurumdan bildirilib ki, Dövlət Ekoloji Təhülkəsizlik Xidməti tərəfindən məsələylə bağlı araşdırma aparılacaq.
Bəs ekoloqlar bu barədə nə düşünür?
Ekoloq Ənvər Əliyev açıqlamasında qeyd edib ki, bu cür obyektlərə qarşı sərt cəza tədbirləri görülməlidir:
"Birincisi, restoranlar kömürlə işləməlidir. Yeməklər odunla bişirilməməlidir. İkincisi, şəhərin mərkəzində olan restoranlar filtirlərdən istifadə etməlidir. Yaxud da, xüsusi kömürlərdən istifadə olunmasi məsləhətdir. Hər halda insan oksigenlə qidalanır. Axşam tərəfi insan pəncərəni açır ki, otaqlara hava girsin. Lakin, çöldə tüstünün olması havanı daha da pisləşdirir. Bunlara qarşı cəza tədbirləri görülməlidir”.
Xatırladaq ki, Prezident İlham Əliyev havanı çirkləndirən məişət obyektlərinə ciddi xəbərdarlıq edib. Ölkə başçısı bildirib ki, tələblərə əməl etməyən şadlıq evlərinin və məişət obyektlərinin qapısı bağlanacaq. Sonra isə İlham Əliyev "Azərbaycan Respublikasının Ekologiya və Təbii Sərvətlər Nazirliyi haqqında Əsasnamənin təsdiq edilməsi barədə” fərmanda dəyişiklik edilməsi haqqında yeni fərman imzaladı.
Əsasnaməyə əsasən, nazirliyə ekoloji tələblərin pozulması ilə əlaqədar müəssisələrdə, qurğu və obyektlərdə təsərrüfat və başqa fəaliyyətlərin məhdudlaşdırılması və ya bu fəaliyyətə xitam verilməsi haqqında vəsatət qaldırmaq hüququ verilib. Dəyişikliyə əsasən, artıq ETSN məhkəməyə müraciət etmədən ekoloji tələblərin pozulması ilə əlaqədar müəssisələrdə, qurğu və obyektlərdə təsərrüfat və başqa fəaliyyətlərin dayandırılması və ya qadağan edilməsi barədə qərar qəbul edə bilər.
Lakin buna baxmayaraq, müvafiq qurğunu quraşdırmayan, havanı çirkləndirməyə davam edən restoranlar hələ də var.
