Sumqayıtın daha bir mikrorayonunda zibil qutularının boşaldılması zamanı ərazinin çirkləndirildiyi bildirilir.
Bu barədə Sumqayit24.az-a şəhər sakinləri məlumat veriblər.
Onların sözlərinə görə, 17-ci mikrorayonda, 7 və 8-ci binaların qarşısındakı zibil qutularından tullantıların daşınması zamanı çirkab su küçəyə axıdılır. Nəticədə ərazidəki çökəkliklərə zibil suyu dolur və antisanitar vəziyyət daha da ağırlaşır.
Sakinlər bildirirlər ki, bunun nəticəsində ərazidə kəskin üfunət qoxusu yayılır və piyadaların hərəkəti çətinləşir.
Vətəndaşlar aidiyyəti qurumdan tullantıların daşınması zamanı ətrafın çirkləndirilməməsi üçün daha diqqətli olmağı xahiş edirlər.
Xatırladaq ki, Sumqayit24.az avqustun 8-də 6-cı mikrorayonda da zibil qablarının boşaldılması zamanı ətraf ərazinin çirkləndirilməsi ilə şikayət işıqlandırıb.
