Sumqayıtda yerləşən “Gold Qayalı” mağazasında alış-veriş edən vətəndaş xoşagəlməz halla rastlaşıb.
Bakıvaxtı.az-ın məlumatına görə, həmin şəxs marketdən aldığı mayonezin üzərindəki tarixə sonradan diqqət yetirib. Belə ki, məhsulun üzərində son istifadə tarixi 12 mart 2025-ci il göstərilsə də, ərzaq may ayında, yəni istifadəyə yararlılıq müddətindən təxminən iki ay sonra satılıb.
Şikayətçinin sözlərinə görə, məhsulu qaytarmaq üçün marketə yaxınlaşdıqda mağaza əməkdaşları bu vəziyyəti adi hal kimi qarşılayıblar:
“Vaxtı keçmiş malın satıldığına görə bizdən üzr belə istəmədilər. Sanki belə də olmalı imiş kimi “verin dəyişdirək” dedilər”.
Vətəndaş vurğulayıb ki, sonradan vitrinə yaxınlaşdıqda orada eyni tarixdə vaxtı bitən daha 2 ədəd mayonez vardı:
“Bizim məhsulumuzu dəyişdirdikdə digər vaxtı keçmiş mayonezləri vitrindən götürdülər”.
Həmin şəxs son istifadə tarixinə diqqət etməsə, yaşana biləcək bədbəxt hadisədən narahat olduğunu da qeyd edib:
“Bu, məsuliyyətsizlikdir. Onu yeyib zəhərlənsəydik, kim cavabdeh olacaqdı? Sadəcə “verin dəyişək” deməklə məsələ bitir? Gün ərzində minlərlə vətəndaş həmin supermarketdən alış-verişlərini edir. Bu hal tək bizim ailənin yox, minlərlə insanın sağlamlığı ilə oynamaqdır”.
