Bu gün sumqayıtlı şəhidin anım günüdür.
Sumqayit24.az xəbər verir ki, şəhid Ənvər Emil oğlu İmanov 11 yanvar 1999-cı ildə Sumqayıtda zəhmətkeş ailədə dünyaya gəlib.
2005-2016-cı illərdə Sumqayıt şəhər 41 saylı tam orta məktəbdə təhsil alıb və orta məktəb illərində fəal şagird olub.
2015-ci ildən qol güləşi idman növü ilə məşğul olmağa başlayıb və Respublikada keçirilən yarışlarda iştirak edərək mükafatçı olub.
2016-cı ilin yanvar ayında həqiqi hərbi xidmətə yola düşüb. Gəncə və Tovuz rayonlarında yerləşən N saylı hərbi hissələrdə baş atıcı vəzifəsində xidmət edib. 2017-ci ilin iyul ayında həqiqi hərbi xidmətini başa vuraraq böyüyüb boya-başa çatdığı Sumqayıt şəhərinə qayıdıb və fərdi əmək fəaliyyətinə başlayıb. Kuryer olaraq fəaliyyətə başlayan Ənvər administrator vəzifəsinə kimi yüksəlib. 2019-cı ilin yanvar ayında Ənvər sevib- seçdiyi, bir sinifdə oxuduğu Məleykə xanımla nişanlanıb.
2020-ci il sentyabrın 27-də başlayan 44 günlük Vətən Müharibəsi zamanı Cəbrayılın, Füzulinin, Xocavəndin azadlığı uğrunda gedən döyüşlərdə savaşıb. 28 oktyabrda Xocavəndin azadlığı uğrunda gedən ağır döyüşlər zamanı isə sol tərəfindən və qarın nahiyyəsindən düşmən gülləsinə tuş gəlib və 21 yaşında şəhidlik zirvəsinə ucalıb. 29 oktyabrda isə Sumqayıt Şəhidlər Xiyabanında dəfn olunub.
Prezident İlham Əliyevin müvafiq Sərəncamlarına əsasən, Ənvər Emil oğlu İmanov ölümündən sonra "Vətən uğrunda" , "Cəbrayılın azad olunmasına görə", "Xocavəndin azad olunmasına görə" və "Füzulinin azad olunmasına görə" medalları ilə təltif edilib.
