Bakı–Pirşağı–Sumqayıt xətti üzrə hərəkət edən sürət qatarları Məmmədli, Pirşağı, Gorədil və Novxanı qəsəbələrindən keçərək həmin məntəqələrdə dayanır. Lakin Abşeron rayonunun ən böyük yaşayış məntəqələrindən biri, təxminən 40 min nəfərə yaxın əhalisi olan Saray qəsəbəsində dayanacaq mövcud deyil.
Sakinlər Sumqayit24.az-a bildiriblər ki, qəsəbədə son illərdə bir neçə iri yaşayış kompleksi inşa olunub, əhali sürətlə artır:
"Qatarlar qəsəbənin içindən keçir, lakin dayanacaq olmadığı üçün istifadə edə bilmirik. Halbuki əhali sayı və gündəlik gediş-gəliş baxımından Saray digər qəsəbələrlə müqayisədə daha çox yüklənir. Sürət qatarı Saraydan başqa hər yerdə dayanır".
Əhali qurumlardan dayanacağın yaradılması məsələsini ciddi nəzərdən keçirməyi tələb edir.
