Sumqayıt Dövlət Universitetinin rəhbərliyi beynəlxalq konfransın açılış mərasiminə qatılıb. Bu barədə 30 sentyabr tarixində Sdu.edu.az-a istinadən xəbər veririk.
“Təhsildə davamlı keyfiyyət təminatı" adlı konfrans Təhsildə Keyfiyyət Təminatı Agentliyi tərəfindən "Baku Marriott Boulevard" hotelində baş tutub. Burada təhsil ocağının rektoru, professor Elxan Hüseynov və Təhsildə keyfiyyət təminatı şöbəsinin müdiri, baş müəllim Nərmin Həsənova iştirak ediblər.
İki gün davam edəcək konfransın ilk günündə Niderland Krallığının Ali Təhsil Departamentinin direktoru Hendrik Martijnse, Ali təhsil üzrə beynəlxalq ekspert, 2009-2013-cü illərdə Avropa Ali Təhsil Məkanında Keyfiyyətin Təminatı üzrə Assosiasiyasının (ENQA) prezidenti olmuş Achim Hopbach, Ali Təhsildə Keyfiyyət Təminatı Agentliklərinin Mərkəzi və Şərqi Avropa Şəbəkəsinin (CEENQA) vitse-prezidenti Olgun Çiçek, Təhsil İnstitutunun direktoru Rüfət Əzizov, Ümumi və məktəbəqədər təhsilin təşkili və idarə olunması şöbəsinin müdiri Elnur Əliyev vacib mövzularda müzakirələr aparıblar.
Bu gün isə ali və ümumi təhsil müəssisələrinin nümayəndələri üçün beynəlxalq ekspertlər tərəfindən praktik təlimlər keçiriləcək.
