Yenilənib: saat 15:44
Daxili İşlər Nazirliyinin (DİN) Mətbuat Xidmətinin əməkdaşı Nurlan Əliyev bildirib ki, hazırda müəllim və şagirdin valideynləri Sumqayıt Şəhər Polis İdarəsinə dəvət olunublar:
"Araşdırmanın nəticəsindən asılı olaraq, əmələ hüquqi qiymət veriləcək".
Hadisənin cari ilin yanvar ayında baş verdiyi müəyyən olunub.
—————————————————————————————————————————–
Sumqayıtda müəllimin uşağa qarşı şiddət göstərdiyi tədris mərkəzi açıqlama verib. Bu haqda 20 may tarixində Sumqayıt24 Oxu.az-a istinadən xəbər verir.
Sosial şəbəkələrdə müəllimin uşaqları kəndirlə döyməsi videosu yayılıb. Videogörüntü “Xəmsə” Tədris Mərkəzi Sumqayıt filialında lentə alınıb.
Yayılan videogörüntülərlə bağlı açıqlama verən adıçəkilən tədris mərkəzinin direktor əvəzi Amaliya Əliyeva bildirib:
“O, bizim tədris müəssisəmizdə icarəyə otaq götürüb, riyaziyyat fənnindən dərs deyib. Pandemiya dövründə çalışıb və hadisə də o vaxt olub. Lakin videogörüntülər indi yayılıb. Müəllim artıq bizim müəssisədə çalışmır”.
A. Əliyeva qeyd edib ki, həmin müəllim pandemiya dövründən “Xəmsə” Tədris Mərkəzində icarəyə otaq götürüb:
“Elşad Qurbanov həmin dövrdə bizdə dərs deyib. Hətta nəticələri yüksək olan müəllimlərdən biridir. Valideynlər uşaqlarını riyaziyyatdan məhz o müəllimin hazırlaşdırmasını istəyirdilər. Yüksək nəticə əldə etsinlər deyə o vəziyyətdə dərs keçməsinə belə valideynlər razı idi. Elşad Qurbanovun qrupuna uşaq yerləşdirmək də çətin idi, hər uşağı qrupa götürmürdü. Həmin videogörüntülərdəki hadisə də pandemiya dövründə olub. Hadisənin videogörüntüləri indi yayılıb. Heç o dövrdə də bizə bu barədə valideyn şikayəti daxil olmamışdı”.
