Sumqayıtda “Uşaqlar bizim gələcəyimizdir” mövzusunda konfrans keçirilib. Bu haqda 19 may tarixində Sumqayıt24 Daxili İşlər Nazirliyinin (DİN) mətbuat xidmətinə istinadən xəbər verir.
Şəhər Polis İdarəsinin inzibati binasında keçirilən konfransda polis əməkdaşları, Elm və Təhsil Nazirliyinin, Ailə, Qadın və Uşaq Problemləri üzrə Dövlət Komitəsinin, Əmək və Əhalinin Sosial Müdafiəsi Nazirliyinin, yerli icra hakimiyyətləri orqanlarının nümayəndələri, qeyri-hökumət təşkilatlarının rəhbərləri iştirak ediblər.
Çıxış edənlər sağlam mühitdə tərbiyə olunmasının, gələcəyin peşəkar kadrları və cəmiyyətimizə layiqli vətəndaş kimi yetişmələrinin vacibliyindən danışıb.
Tədbirdə müzakirə olunan mövzularla bağlı videoçarxlar nümayiş etdirilib, həmçinin yetkinlik yaşına çatmayanlarla işin səmərəliliyinin artırılması istiqamətində gələcəkdə həyata keçirilməsi nəzərdə tutulan təkliflər ətrafında da müzakirələr aparılıb.
