Türkiyə vətəndaşını soyan şəxslərin apellyasiya şikayəti üzrə məhkəmə yekunlaşıb. Sumqayıt24 bu haqda 12 oktyabr tarixində Sumqayıt.tv-yə istinadən xəbər verir.
Gəncə Apellyasiya Məhkəməsində hakim Nural Əliyevin sədrliyi ilə keçirilən prosesdə qərar elan olunub. Qərara əsasən, apellyasiya şikayəti təmin edilməyib.
Qeyd edək ki, hadisə 2021-ci il sentyabrın 20-si gecə saatlarında baş verib. Türkiyə Respublikasının vətəndaşı Rəcəb Pəhlivan Mustafa Daxili İşlər Nazirliyinə (DİN) bildirib ki, idarə etdiyi yük avtomobili ilə Bakıyə gələrkən tanımadığı şəxslər onu saxladaraq deşici alətlə hədələyib və 428 manat pulunu quldurluq yolu ilə ələ keçiriblər.
Gəncə şəhər Baş Polis İdarəsi və Kəpəz rayon Polis İdarəsi əməkdaşlarının keçirdikləri əməliyyat nəticəsində quldurluqda şübhəli bilinən Ağstafa rayon Qırlı kənd sakini, əvvəllər soyğunçuluq əməlinə görə məhkum olunmuş Rasim Tağıyev həmyerlisi Kənan Abbasov və tanışı, Sumqayıt şəhər sakini Ramin Sadıqov ilə birlikdə sonuncuya məxsus “Mercedes” markalı avtomobil ilə Rəcəb Pəhlivan Mustafanı texniki nasazlıq bəhanəsi ilə işarə edərək saxladıblar.
Daha sonra K. Abbasov vintaçanla kişini hədələyib, R. Tağıyev isə onun cibindən 420 manatı götürərək oradan uzaqlaşıblar.
Gəncə Ağır Cinayətlər Məhkəməsinin hökmü ilə Rasim Tağıyevlə Kənan Abbasov 9 il, Ramin Sadiqov isə 8 illik həbs həyatına məhkum olublar.
