Sumqayıtda yaşayış massivlərindən birində yaranan vəziyyət narahatlıq doğurur.
Sumqayit24.az-a müraciət edən sakinlərin sözlərinə görə, Yaşıl Dərə yaşayış massivində yolun üzərindən keçən suötürücü boru deformasiyaya uğrayıb.
İddia olunur ki, bu səbəbdən xüsusilə də yağıntılı hava zamanı boru yağış və çirkab sularını tam ötürə bilmir. Nəticədə kanal daşır, ərazi su altında qalır.
Sakinlərin sözlərinə görə, yaranmış vəziyyət həm piyadaların, həm də nəqliyyat vasitələrinin hərəkətində ciddi çətinliklər yaradır. Bundan əlavə, ərazidə toplanan çirkab sular antisanitar vəziyyətin yaranmasına səbəb olur.
Vətəndaşlar problemin qısa müddətdə aradan qaldırılması üçün aidiyyəti qurumların tədbir görməsini xahiş edirlər.
