Vətən müharibəsində şəhid olmuş Rauf İbadovun doğum günüdür. O, 4 may 1996-cı ildə Saray qəsəbəsində anadan olub.
Rauf 2002-2013-cü illərdə 2 saylı məktəbdə oxuyub. Ali təhsilini Azərbaycan Memarlıq və İnşaat Universitetinin İnşaat Texnologiya fakültəsində alıb. O, 2017-ci ildə əsgərliyə yollanıb, nümunəvi xidmətinə görə Fəxri Fərmanla təltif olunub və hərbi hissə komandiri ona hədiyyə olaraq, qol saatı verib.
Hərbi xidmətdən sonra şəhidimiz universitetdə rəsm əsərlərindən ibarət sərgi təşkil edib, müxtəlif müsabiqələrə qatılaraq 15-ə yaxın Fəxri Fərmana layiq görülüb.
Vətən müharibəsinə könüllü yollanan Rauf İbadov Füzuli, Cəbrayıl, Hadrut, Qubadlı cəbhələrində vuruşub. Son məlumata görə, 23 oktyabr 2020-ci ildə Laçın yolu ərazisində silahdaşları ilə mühasirəyə düşüb, lakin sonadək vuruşaraq qəhrəmancasına həlak olub. Onun cənazəsi bir neçə gün neytral ərazilərdə qalıb və yalnız atəşkəs elan olunduqdan sonra oradan çıxarılıb.
Şəhidimiz "Vətən Uğrunda", "Cəbrayılın azad olunmasına görə" və "Füzulinin azad olunmasına görə" medalları ilə təltif edilib.
