Sumqayıt şəhəri Xəzər Bağları yaşayış massivində sakinlər uzun müddətdir təhlükə ilə üz-üzə qaldıqlarını bildirirlər.
Sumqayit24.az-a müraciət edən vətəndaşların sözlərinə görə, Novruz küçəsində kanalizasiya xəttinin çəkilişi üçün qazılan dərin çuxur bir ildən artıqdır açıq vəziyyətdə qalıb.
Ərazi nə tam hasarlanıb, nə də təhlükəsizlik tədbirləri görülüb. Bu isə xüsusilə uşaqlar və yaşlılar üçün ciddi risk yaradır.
Şikayətçilər iddia edirlər ki, bir neçə gün əvvəl 3 yaşlı uşaq az qala açıq qalan dərin çuxura düşəcəkdi. Valideynlərin müdaxiləsi nəticəsində mümkün faciənin qarşısı son anda alınıb.
"Burada kanalizasiya borusu quraşdırılır. İkinci ildir ki, bu vəziyyətdə qalıb. Dəfələrlə şikayət etmişik. Gediş-gəlişimizə mane olur. Burada yaşlı insanlar, xəstələr, azyaşlı uşaqlar yaşayır. O gün 3 yaşlı oğlan az qala çuxura düşəcəkdi. Heç bir təhlükəsizlik tədbiri görülməyib", – deyə sakinlər əlavə ediblər..
Sakinlər aidiyyəti qurumlardan ərazidə təhlükəsizlik tədbirlərinin görülməsini, qazıntının ətrafının hasarlanmasını və işlərin qısa müddətdə başa çatdırılmasını xahiş edirlər.
