Sentyabrın 20-si Azərbaycanda Dövlət Suverenliyi Günü kimi qeyd olunur.
Bu gün 2024-cü il sentyabrın 19-da Prezident İlham Əliyevin imzaladığı Sərəncamla təsis edilib. Sənəddə vurğulanır ki, Ermənistan 1990-cı illərin əvvəllərindən etibarən BMT Nizamnaməsinin tələblərini pozaraq Azərbaycanın beynəlxalq səviyyədə tanınmış ərazilərinin 20 faizini işğal etmişdi.
2020-ci il sentyabrın 27-də başlayan 44 günlük Vətən müharibəsində Azərbaycan Ordusu Ermənistan silahlı qüvvələrini məğlub edərək böyük Zəfər əldə etdi. Ardınca, 2023-cü il sentyabrın 19-da Qarabağ iqtisadi rayonunda həyata keçirilən lokal antiterror əməliyyatı cəmi 23 saat davam edərək sentyabrın 20-də uğurla başa çatdı.
Bu əməliyyat nəticəsində Azərbaycanın suverenliyi tam bərpa olundu və məhz bu səbəbdən 20 sentyabr Dövlət Suverenliyi Günü kimi qeyd edilir.
