Abşeron Gənclər Şəhərciyində çox narahat bir vəziyyət yaranıb.
Baku.ws-in məlumatına görə, bütün sakinlər, yaxın olan qonşular həmin binanın birinci mərtəbəsində yaşayan və vaxtaşırı qeyri-adi hərəkətlər edən qadına görə həyəcan keçirirlər.
"Bakı-Sumqayıt yolunun 7-ci km.də yerləşən kompleks Abşeron Gənclər Şəhərciyi adlanan yaşayış massividir. Həmin binada yaşayan qadın gecələr qışqırır. Aşağıda park edilən avtomobillərin üzərinə əşya, yumurta və əlinə keçən hər şeyi atır. Dayanmadan qışqırır və çox qorxuducu hal yaradır", - deyə şikayətçilər qeyd ediblər.
Problemlə bağlı lazımı yerlərə şikayət olunsa da, məsələ həllini tapmayıb.
Daxili İşlər Nazirliyinin (DİN) Mətbuat Xidmətinin əməkdaşı polis leytenantı Elbrus İbrahimov narahatlıq yaradan qadınla bağlı paylaşılan görüntülərin araşdırıldığını bildirib.
Onun sözlərinə görə, həmin şəxsin sağlamlıq vəziyyəti ilə əlaqədar polis əməkdaşları və aidiyyəti dövlət qurumları tərəfindən birgə tədbirlər görülüb.
