Sumqayıtda böyüyən Aytac Qarayeva təhsil və karyera yolunda qazandığı uğurlarla diqqət çəkib.
Məlumata görə, Aytac Qarayeva dünyanın 7 nüfuzlu universitetində tələbə olmaq imkanı qazanıb.
O, 7 universitet arasında London İmperial Kollecində təhsil almağı seçib. Lakin maliyyə səbəbindən hazırda həmin universitetdə təhsil ala bilmir.
Sumqayıt şəhərində anadan olan Aytac Qarayeva 4 nömrəli tam orta məktəbi fərqlənmə attestatı ilə bitirib. Daha sonra Prezident yanında Dövlət İdarəçilik Akademiyasında "İqtisadiyyat" ixtisası üzrə bakalavr təhsili alıb. Universitetdə akademik göstəricisi 97 olub, IELTS imtahanından 7.0 nəticə əldə edib.
O, təhsil müddətində İqtisadiyyat Nazirliyi, Azərbaycan Mərkəzi Bankının "MaliyyəçiSən" proqramı, İqtisadi İslahatların Təhlili və Kommunikasiya Mərkəzi və Dövlət Gömrük Komitəsində müxtəlif istiqamətlər üzrə təcrübə keçib. Həmçinin COP29, Dünya Telekommunikasiyanın İnkişafı Konfransı (WTDC), "Yüksəliş" müsabiqəsi və ASAN Xidmət kimi layihələrdə könüllü və komanda rəhbəri kimi fəaliyyət göstərib.
Aytac Qarayeva IV "Maarifçi" tələbə-məzun proqramına qəbul olunan 53 iştirakçıdan biridir. Hazırda o, proqram çərçivəsində Peşə Təhsili üzrə Dövlət Agentliyinin Maliyyə şöbəsində təcrübə keçir.
Aytacın sözlərinə görə, qazandığı uğurların arxasında ailəsinin dəstəyi, uzunmüddətli zəhmət və qarşıya qoyduğu məqsədlərə inam dayanır. O, "Maarifçi" proqramının dövlət idarəçiliyini yaxından öyrənmək, nəzəri biliklərini real iş mühitində tətbiq etmək və peşəkar təcrübə qazanmaq baxımından mühüm mərhələ olduğunu bildirib.
Mənbə: Azərbaycan müəllimi
