Bu gün Sumqayıtdan və Saraydan olan şəhidlərimizin doğum günüdür.
Şamilov Fərid Mirzə oğlu 4 may 1999-cı ildə Sumqayıt şəhərində zəhmətkeş bir ailədə dünyaya gəlib.
2005-2016-cı illərdə Sumqayıt şəhər 16 saylı tam orta məktəbdə təhsil alıb.
2020-ci ildə könüllü olaraq Səfərbərlik və Hərbi Xidmətə Çağırış idarəsinə ərizə ilə müraciət edib. Sentyabrın 27-də cəbhə bölgəsinə yollanıb. Füzuli, Cəbrayıl, Zəngilan, Xocavənd, Şuşa, Laçın rayonları uğrunda gedən döyüşlərdə igidlik göstərərək vətənə layiqincə xidmət edib.
2020-ci il noyabrın 8-dən 9-na keçən gecə Fərid Şamilovun Xocavənd rayonunun Qırmızı Bazar qəsəbəsində son döyüşü olub. Ağır döyüşdə minamyot atəşi Fəridi yaralayıb və o, şəhidlik zirvəsinə ucalıb. Sumqayıt şəhər Şəhidlər Xiyabanında dəfn edilib.
Prezident İlham Əliyevin sərəncamlarına əsasən, ölümündən sonra Fərid Şamilov "Vətən uğrunda", "Cəbrayılın azad olunmasına görə", "Xocavəndin azad olunmasına görə" və "Füzulinin azad olunmasına görə" medalları ilə təltif edilib.
Bu gün həmçinin şəhid İbadov Rauf Məhərrəm oğlunun da doğum günüdür.
O, 4 may 1996-cı ildə Saray qəsəbəsində anadan olub. 2002-2013-cü illərdə 2 saylı orta məktəbdə təhsil alıb. 2013-2017-ci illərdə Azərbaycan Memarlıq və İnşaat Universitetində İnşaat Texnologiya fakültəsində təhsilini davam etdirib.
2020-ci il sentyabr ayın 21-dən cəbhəyə yollanıb. Müharibə başladığı ilk gündən Füzuli, Cəbrayıl, Hadrut, Qubadlı cəbhələrində göstərdiyi şücaətinə görə, Rauf manqa komandiri təyin olunub. 23 oktyabr tarixində Laçın Dəhlizi ərazisində mühasirəyə düşdükləri zaman əlbəyaxa döyüşlə bir neçə düşməni məhv edib və qəhrəmancasına şəhid olub.
30 oktyabr 2020-ci il tarixində Saray qəsəbəsindəki Şəhidlər Xiyabanında dəfn olunub.
Prezident İlham Əliyevin sərəncamlarına əsasən, ölümündən sonra İbadov Rauf "Vətən uğrunda", "Cəbrayılın azad olunmasına görə" və "Füzilinin azad olunmasına görə" medalları ilə təltif olunub.
