Sumqayıtda bağça tərbiyəçiləri əməkhaqlarının kəsildiyini iddia edirlər. Bununla bağlı sosial şəbəkələrdə videogörüntülər yayılıb.
65 saylı körpələr evi - uşaq bağçasının əməkdaşları Sevda Nəzərli, Validə Muradlı və Elmira İbadova bu barədə müvafiq orqanlara, Abşeron-Xızı Regional Təhsil İdarəsinə müraciət etdiklərini bildiriblər. Lakin verilən cavabın şikayətlə uyğun gəlmədiyini deyirlər.
Abşeron-Xızı Regional Təhsil İdarəsindən Xeberle.com-a açıqlama verilib:
“Azərbaycan Respublikasının Nazirlər Kabinetinin "Büdcədən maliyyələşdirilən məktəbəqədər uşaq müəssisələrinin nümunəvi ştatı haqqında” 29 may 1996-cı il tarixli 61 saylı qərarına əsasən, 5 günlük iş həftəsində 10.5 saatlıq iş qrafiki ilə fəaliyyət göstərən məktəbəqədər təhsil müəssisəsində 1.55 ştat vahidi tərbiyəçi nəzərdə tutulmuşdur”.
İş stajlarının çox olmasını nəzərə alaraq, həmçinin məzuniyyətdə olan tərbiyəçilərin əvəz edilməsi hesabına Sevda Nəzərli, Elmira İbadova və Validə Muradlıya 1.0 ştat vahidi üzrə əməkhaqqı ödənilmişdir.
Qeyd olunub ki, bağçanın müdiri həmin şəxsin dəfələrlə bu şəkildə videolar çəkərək sosial şəbəkələrdə yerləşdirdiyini və müxtəlif qurumlara heç bir hüquqi əsası olmayan şikayət məktubları yazdığını bildirib.
