Anım Günü münasibətilə Sumqayıtda müxtəlif tədbirlər keçirilib. Bu barədə 27 sentyabr tarixində Sumqayıt24 xəbər verir.
İlk növbədə Sumqayıt Tibb Mərkəzi (STM) və tabeliyində olan tibb müəssisələrində baş tutan mərasimlərdən söz açaq. Bir dəqiqəlik sükutdan sonra burada zəfər savaşından geniş söhbət açılıb. Çıxış edənlər şəhid adının müqəddəsliyindən danışıblar.
Daha sonra STM-in kollektivi Şəhidlər xiyabanını ziyarət edib və məzarların üzərinə gül dəstələri düzüb.
Nizami Gəncəvi adına Kitabxana Klubunda məlumat günü keçirilib. Kitabxananın əməkdaşı Səadət Allahverdiyeva oxucularla Vətən müharibəsində qazanılan şanlı qələbədən, Azərbaycan oğullarının göstərdiyi qəhrəmanlıq və şücaət nümunələrindən danışıb.
Günün davamında oxuculara şəhidlərə həsr olunan kitab və dövri mətbuatda çıxan materiallardan ibarət sərgi haqqında məlumat verilib.
Digər tədbir Sumqayıt Dövlət Universitetinin Elmi kitabxanasında baş tutub.
Kitabxananın müdiri Nailə Əmrahova ordumuzun misilsiz qələbəsindən, xalq-ordu birliyindən danışıb. Elmi kitabxananın əməkdaşları Səbiqə Mirzəyeva “Tarix yazan qəhrəmanlarımız”, Nazirə Novruzova “Biz haqq yolundayıq”, Rəqsanə Əbdürəhmanova “Prezident cənab İlham Əliyevin Vətən müharibəsi və ondan sonrakı dövrdə fəaliyyəti” mövzularında çıxış ediblər.
Həmçinin Sumqayıtın Tarixi Muzeyində “Azərbaycanın Sumqayıtlı Milli Qəhrəmanları” adlı görüş təşkil olunub. Muzeyin bələdçisi tərəfindən iştirakçılara mövzu ilə bağlı mühazirə və videoçarx təqdim olunub. Tədbirdə Yüksək Texnologiyalar üzrə Sumqayıt Dövlət Peşə Təhsil Mərkəzinin müəllim və şagirdləri iştirak ediblər. Təhsil ocağının 13 məzunu şəhidlik zirvəsinə ucalıb.
Sonda muzeyin “Şəhidlər Qalereyası” zalında sumqayıtlı şəhidlərə həsr olunmuş daimi ekspozisiya nümayiş olunub.
