Sumqayıtda uroloq və androloqların toplantısı keçirilib. Sumqayıt24 bu haqda 1 may tarixində Sumqayıt Tibb Mərkəzinə (STM) istinadən xəbər verir.
İclas ulu öndər Heydər Əliyevin 100 illik yubileyinə həsr olunub və Səhiyyə Nazirliyi, TƏBİB, Azərbaycan Urologiya Assosiasiyası (AUA), Andrologiya və Reproduktiv Təbabət Assosiasiyası (ARTA) və Sumqayıt Tibb Mərkəzi (STM) tərəfindən təşkil olunub.
Burada “Sidik daşı xəstəliyi” mövzusunda konfrans baş tutub. Müxtəlif tibb müəssisələrində çalışan 100-ə yaxın uroloq, androloq ginekoloqlar və digər ixstisas sahiblərinin qatıldığı konfransda çıxış edən "Şöhrət" ordeni laureat, Azərbaycan Tibb Universitetinin Urоlоgiyа kаfedrаsının müdiri, AMEA-nın müxbir üzvü Südeyif İmamverdiyev ulu öndərin Azərbaycanın inkişafındakı xidmətlərindən danışıb.
ATU-nun Tədris Cərrahiyyə Klinikasının Urologiya kafedrasının professoru, ARTA-nın sədri İlham Əhmədov iştirakçılara müzakirə olunacaq məsələləri açıqlayıb.
TƏBİB-in İxtisaslı tibbi yardım departamentinin rəhbəri Teymur Mirzəbəyli çalışdığı qurumun xəstəliklərlə mübarizədə əldə etdiyi nailiyyətlərdən söz açıb.
Sumqayıt Tibb Mərkəzinin direktoru Səkinə Sadıxova isə rəhbərlik etdiyi qurumun fəaliyyətini diqqətə çatdırıb.
Sonra konfrans iştirakçıları Heydər Əliyevin həyat yolundan bəhs edən videoçarxı izləyiblər.
Akademik M. Cavadzadə adına Respublika Kliniki Uroloji Xəstəxanasının həkim-uroloqu Elçin Mustafayev “Perkutan cərrahiyyədə təcrübəm”, uroloq-androloq Mansur Xəlilov “İntrarenal cərrahiyyə nə qədər üstündür?”, Kliniki Tibbi Mərkəzin Urologiya şöbəsinin müdiri, həkim-uroloq Araz İbrahimov “Mərhələ-mərhələ URS”, uroloq-androloq Niyammədin Əliyev “Anomalik böyrəklərdə perkutan nefrolitotomiya” mövzularında təqdimatlarla çıxış ediblər.
Sumqayıt Tibb Mərkəzinin 1 nömrəli Şəhər Xəstəxanasının baş həkimi, həkim-uroloq Mətləb Musayev isə Sumqayıtda uroloji xidmətin vəziyyətinə toxunub. Rəhbərlik etdiyi xəstəxananın urologiya şöbəsində həyata keçirilən əməliyyatlardan, gələcək perspektivlərdən geniş danışıb.
Akademik M. Cavadzadə adına Respublika Kliniki Uroloji Xəstəxananın Uşaq urologiyası şöbəsinin müdiri, tibb elmləri üzrə fəlsəfə doktoru Rafael Soltanov “Uşaqlarda daş xəstəliklərinin müalicəsinə endoskopik yanaşma”dan, ATU-nun II mamalıq-ginekologiya kafedrasının dosenti, cərrah mama-ginekoloq Şəymən Qədimova isə “Hamilə qadınlarda daş xəstəliyi”ndən bəhs edib. .
Sonda bir çox konfrans iştirakçılarına fəxri fərmanlar verilib.
