Sumqayıt şəhəri, Babək küçəsi ərazisində yol hərəkəti ilə bağlı vəziyyət getdikcə daha da gərginləşir. Mövzu ilə bağlı Sumqayit24.az redaksiyasına çoxsaylı şikayətlər daxil olur.
Narazı sürücülərin sözlərinə görə, küçədə bir neçə iri marketin fəaliyyət göstərməsi səbəbindən gün ərzində həm piyadaların, həm də avtomobillərin sıxlığı xeyli artır. Ərazidə piyada keçidi olsa da, işıqforun olmaması hərəkətin tənzimlənməsində ciddi problemlər yaradır.
Belə ki, piyadalar yolu tez-tez və bəzən qaydalara əməl etmədən keçməyə çalışır. Avtomobillər isə onlara yol vermək üçün tez-tez dayanmalı olur. Nəticədə küçədə hərəkət demək olar ki, iflic vəziyyətinə düşür, uzun tıxaclar yaranır və sürücülərlə piyadalar arasında gərgin anlar yaşanır.
Məsələ ilə bağlı vətəndaşlar aidiyyəti qurumları vəziyyətə müdaxilə etməyə çağırır. Onların fikrincə, ərazidə işıqforun quraşdırılması və hərəkətin düzgün tənzimlənməsi həm tıxacların qarşısını ala, həm də mümkün yol-nəqliyyat hadisələrinin riskini azalda bilər.
