Sumqayıt Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Xəyal Səfərovun (şərti) cinayət işi üzrə məhkəmə istintaqı başa çatıb.
Pravda.az-ın məlumatına görə, hakim sonuncu keçirilən prosesdə hökm oxuyub.
Məhkəmənin hökmü ittiham edilən şəxs 4 il müddətinə azadlıqdan məhrum edilib və məhkəmə zalından həbs olunub.
İttihama görə, hadisə 23 aprel 2024-cü il tarixdə, saat 20:00 radələrində Abşeron rayonu, Əliağa Vahid küçəsində yerləşən “Azərpoçt”un 2 saylı poçt şöbəsi yaxınlığında qeydə alınıb.
Belə ki, 1996-cı ilə təvəllüdlü Xəyal Səfərov küçədə tanışı, zərərçəkmiş Habil Yusifovla (şərti) mübahisə edib. Mübahisəyə səbəb isə zərərçəkmişin onun bacısının mobil telefonuna mesaj yazması olub. Bu zaman Xəyal üzərində olan bıçaqla Habilin qarın nahiyəsinə qəsdən bir dəfə vuraraq, ona xəsarət yetirib.
Hadisədən sonra Xəyal Səfərov saxlanılıb və barəsində başqa yerə getməmək haqqında iltizam qətimkan tədbiri seçilmişdi.
