Bakı–Sumqayıt yolunda baş vermiş ağır qəzada 17 yaşlı qızı Zəhranı itirən vəkil Fərhad Mehdiyev sosial şəbəkədə duyğusal paylaşım edib.
Sumqayit24.az-ın məlumatına görə, o bildirib ki, övladını itirən hər bir valideyn yalnız ağır həsrət və ağrı ilə deyil, həm də həyatını bundan sonra necə və hansı məqsədlə davam etdirəcəyi sualı ilə üz-üzə qalır. Onun sözlərinə görə, belə bir itki insanın bütün arzularını, məqsədlərini və yaşamaq stimulunu əlindən alır, bu acı ilə barışmaq isə mümkün olmur.
Fərhad Mehdiyev qeyd edib ki, insan hər gün taleyi sorğulayır, cavab axtarır, lakin övladının yoxluğunu qəbul edə bilmir. Belə vəziyyətdə artıq xoşbəxt olmaq üçün deyil, sadəcə yaşamağa məcbur olursan, övladına verə bilmədiyin sevgi isə insanın içində sağalmayan yara kimi qalır.
Vəkilin sözlərinə görə, zaman keçdikcə bir qərara gəlirsən – övladının izinin bu dünyadan silinməsinə imkan verməməli, onun danışa bilməyən dili, həyata keçməyən arzularının davamçısı olmalısan. Məhz buna görə də hər gün qızı Zəhra haqqında paylaşım edir:
"Zəhra haqqında hər gün paylaşmağımın səbəbi odur ki, gedişini və yoxluğunu qəbul edə bilmirəm. "O, buradadır" demək istəyirəm. Artıq öz həyatını deyil, onun həyatını yaşamağa məcbur olursan. Çünki özünü artıq onsuz düşünə bilmirsən."
O, valideynlərə də müraciət edərək övladlarına sevgilərini hər gün göstərməyi tövsiyə edib:
"Övladınızın yanağından bir yox, əlli dəfə öpün. Elə edin ki, bu, onun hər gün gözlədiyi bir sevgiyə çevrilsin", – deyə vəkil qeyd edib.
Fərhad Mehdiyev sonda xatırladıb ki, qızı Zəhra bu gün qəbul imtahanında iştirak etməli, gələcək arzularına doğru ilk addımını atmalı idi. Lakin həmin imtahanı bu gün onun əvəzinə özünün verdiyini və bu sınaqdan uğurla keçə bilmədiyini bildirib.
