Bu gün Vətən müharibəsi şəhidi Şöhrət Qasımovun anım günüdür.
Şöhrət Şakir oğlu Qasımov 16 avqust 1992-ci ildə Gədəbəy rayonunda dünyaya göz açıb. Orta təhsilini 1998-ci ildən 2009-cu ilə qədər əvvəlcə Sumqayıt şəhəri 18 saylı tam orta məktəbdə, daha sonra isə Sumqayıt şəhərində yerləşən Cəbrayıl rayonu 5 saylı orta məktəbdə alıb. 2009-cu ildə yüksək balla Azərbaycan Tibb Universitetinin (ATU) Hərbi tibb fakültəsinə qəbul olmuşdur. Universiteti müvəffəqiyyətlə bitirdikdən sonra N saylı hərbi hissədə xidmətə başlamışdır. 3 ay sonra Tərtər rayonunun ön xətdə yerləşən hərbi hissəsində xidmətini davam etdirmişdir. Hərbi tibb qulluqçusu olmuş və qısa zamanda tibb xidməti baş leytenantı rütbəsinə yüksəlmişdir.
Tibb xidməti rəisi baş leytenant Qasımov Vətən müharibəsindəki hərbi əməliyyatlarda iştirak edən hərbi həkimlərimizdən biri olur. 2 gün içərisində bir çox mühüm tapşırıqları icra edir və neytral zonada da, döyüş bölgəsində də qalan yaralılarımızı və şəhidlərimizi çıxara bilir. Sonuncu dəfə 29 sentyabr 2020-ci ildə, Tərtər rayonunun Suqovuşan kəndi istiqamətində gedən döyüşlərdə böyük şücaət göstərərək şəhidlik zirvəsinə ucalıb.
Şöhrət ölümündən sonra "Vətən uğrunda" medalı və 3-cü dərəcəli "Vətənə xidmətə görə" ordeni ilə təltif edilib.
