Bu gün Azərbaycanda Torpaq Çərşənbəsi qeyd olunur. Bu çərşənbə Novruz Bayramı öncəsi qeyd edilən dörd çərşənbənin sonuncusudur və xalq arasında xüsusi əhəmiyyət daşıyır.
İnanca görə, Torpaq Çərşənbəsi günündə torpaq oyanır, nəfəs alır və yazın gəlişi ilə təbiət tam canlanmağa başlayır. Bu gün həm də bolluq, bərəkət və yeni həyatın başlanğıcı rəmzi hesab olunur. Qədim inanclara görə, torpaq bu gündən sonra əkinə hazır olur və insanlar yeni mövsümə ümidlə baxırlar.
Azərbaycanda əsrlərdir davam edən ənənəyə uyğun olaraq insanlar evlərində süfrə açır, tonqal qalayır, bayram əhval-ruhiyyəsini bölüşürlər. Torpaq Çərşənbəsi həm də insanların təbiətə və torpağa olan hörmətinin simvolu kimi qəbul edilir.
Qeyd edək ki, Torpaq Çərşənbəsi yazın müjdəçisi sayılan Novruz bayramına sayılı günlər qaldığını xatırladır.
