Sumqayıt şəhər 23 nömrəli tam orta məktəbinin bir qrup məzunu əldə etdikləri yüksək nailiyyətlər sayəsində Dövlət İmtahan Mərkəzinin qəbul imtahanlarında iştirak etmədən birbaşa ali təhsil müəssisələrinə qəbul olunublar.
Sumqayit24.az Abşeron - Xızı Regional Təhsil İdarəsinə istinadən xəbər verir ki, ADA Universitetinə qəbul olunan Nəsir Bəşirov respublika fənn olimpiadalarının informatika fənni üzrə 2 qızıl və 2 gümüş medalçısıdır. O, həmçinin İnfo Cup beynəlxalq olimpiadasında bürünc medal qazanıb, Avropa Yeniyetmələr İnformatika Olimpiadasında (EJOI) isə fəxri ada layiq görülüb.
ADA Universitetinə qəbul olunan digər məzun Fikrət Əsədzadə informatika üzrə respublika fənn olimpiadalarında 3 gümüş və 1 bürünc medal qazanıb, İnfo Cup beynəlxalq olimpiadasının iştirakçısı olub.
Muhəmmədəli Əhmədzadə də ADA Universitetinə qəbul olunub. O, informatika üzrə respublika fənn olimpiadalarında 1 qızıl, 2 gümüş və 1 bürünc medal əldə edib. Bundan başqa, EJOI və İATİ olimpiadalarında bürünc medallara layiq görülüb.
Bakı Ali Neft Məktəbinə qəbul olunan Eşqin Səfərli kimya fənni üzrə respublika olimpiadalarında 2 gümüş və 1 bürünc medal qazanıb. O, həmçinin Beynəlxalq Kimya Olimpiadasının (IChO) və İstedadlıların Hazırlığı Beynəlxalq Olimpiadasının iştirakçısı olub.
Qafar Quluzadə isə Bakı Dövlət Universitetinə qəbul olunub. O, Azərbaycan dili və ədəbiyyatı fənni üzrə respublika fənn olimpiadalarında 2 gümüş və 2 bürünc medal qazanıb.
Qeyd edək ki, respublika və beynəlxalq fənn olimpiadalarında yüksək nəticə göstərən şagirdlər mövcud qaydalara əsasən qəbul imtahanı vermədən ali təhsil müəssisələrinə qəbul olmaq hüququ əldə edirlər.
