Dərman vasitələrinin istehsalı, daşınması və saxlanması tələblərində dəyişiklik edilib.
Report.az-ın məlumatına görə, Səhiyyə Nazirliyinin Kollegiyası bu barədə qərar qəbul edib.
Dərman vasitələri öz təyinatına, dövlət qeydiyyat sənədlərinə və ya klinik sınaqların protokollarına uyğun olaraq keyfiyyətli, effektiv və təhlükəsiz şəkildə istehsal olunmalıdır.
Tələblərin yerinə yetirilməsi üçün zəruri şəraitin yaradılması və nəzarətin həyata keçirilməsi istehsalçının vəzifəsidir.
Bu tələblərə həmin müəssisədə çalışan işçilər, o cümlədən təchizatçılar və distribyutorlar tərəfindən əməl edilməlidir.
Məqsədə çatmaq üçün müəssisədə keyfiyyətə dair risklərin idarə olunmasını əhatə edən, hərtərəfli hazırlanmış və düzgün tətbiq olunan Əczaçılıq Keyfiyyət Sistemi (ƏKS) olmalı, bütün komponentlər ixtisaslı işçi heyəti, uyğun sahələr və lazımi sayda avadanlıqla təmin edilməlidir.
