Xəbər verdiyimiz kimi, Sumqayıtda fəaliyyət göstərən sərnişin avtobusunda yaranan vəziyyət ciddi narazılıqla qarşılanıb.
Belə ki, 9 nömrəli marşrut avtobusunun sürücüsü nəqliyyat vasitəsini idarə edərkən əllərini sükandan çəkərək telefonla danışıb, avtobusu isə dizi ilə idarə etməyə cəhd göstərib.
Sumqayit24.az-a Azərbaycan Yerüstü Nəqliyyat Agentliyinin (AYNA) mətbuat katibi Tural Orucov bildirib ki, sosial şəbəkədə sürücünün sərnişindaşıma qaydalarını pozduğunu nümayiş etdirən görüntülərlə bağlı AYNA tərəfindən araşdırma aparılıb.
"Məlum olub ki, şəhərin 9 nömrəli müntəzəm marşrut xətti üzrə fəaliyyət göstərən avtobus sürücüsü sükan arxasında telefonla oynayaraq və nəqliyyat vasitəsini ayaqları ilə idarə edərək qaydaları ciddi şəkildə pozub və təhlükəli vəziyyət yaradıb. Sözügedən marşrut xəttinin daşıyıcısına xəbərdarlıq edilib və sürücü barədə ölçü götürülməsi tapşırılıb. Məsuliyyətsiz davranış göstərən və sərnişindaşıma qaydalarını pozan sürücünün izahatı alınaraq işdən azad edilib", - deyə Tural Orucov qeyd edib.
