Sumqayıt məhkəməsində ər-arvadı intim görüntülərlə şantaj edən şəxslə bağlı qərar verilib.
Teleqraf.az-ın məlumatına görə, Xaçmaz rayon sakini, 1992-ci il təvəllüdlü Səfər zərərçəkmiş Fuadın həyat yoldaşı Günellə 2019-cu ildə "TikTok" platformasında tanış olub və görüşməyə başlayıb. O, qadınla görüşdüyü vaxtlarda əldə etdiyi intim foto və videoları telefonunda saxlayıb. Daha sonra bu görüntüləri "WhatsApp" vasitəsilə Fuada göndərərək, yayacağı ilə hədələyib və 2021-ci il dekabrın 26-da "Koroğlu" metrostansiyası yaxınlığında qadından 2 000 manat alıb.
Bununla kifayətlənməyən Səfər 2022-ci il yanvarın 5-də yenidən əlaqə saxlayaraq görüntülərin yayılmaması müqabilində 10 000 manat tələb edib. Fuadın şikayəti əsasında o, saxlanılıb və Cinayət Məcəlləsinin müvafiq maddələri ilə ittiham olunub.
Səfər məhkəmədə özünü təqsirli bilsə də, pul tələb etmədiyini iddia edib. Lakin ilkin ifadəsində görüntüləri özü çəkdiyini və hədə-qorxu gəldiyini etiraf edib.
Zərərçəkmiş Fuad bildirib ki, görüntülər göndərildikdən sonra Səfərlə görüşərək 2 000 manat verib, lakin sonradan yenidən pul tələb olunub. Bu səbəbdən hüquq-mühafizə orqanlarına müraciət edib və daha sonra həyat yoldaşı ilə boşanıb.
Şahid qismində ifadə verən Günel isə münasibətin könüllü olmadığını və ona təzyiq göstərildiyini deyib.
Sumqayıt Ağır Cinayətlər Məhkəməsinin hökmü ilə Səfər 7 il 6 ay müddətinə azadlıqdan məhrum edilib. Apellyasiya şikayəti təmin olunmayıb.
